Heb 12 | APZ | STEP | Oso a'amu sɨsɨhwayo pa'nyoso Anɨtumo sɨmeho hi'ntnnono umotofoso hofɨko sɨmeho hi'ntnnono uyo'ne yahinoso nto netɨhwamentohofofoho. Hofɨkoe hungkunoso upa'nɨwo'nɨngkuhwono. Oso'no nakwo Anɨtuye honɨngkanomo walokuhwone hn'nwi nakwo yo'mayo wonyoso Anɨtuye honɨngkano wopɨngomo pɨjwonesyohumaso so'nji yo'mayo yahino nakumo yokumpohn'nyo nemokosyohumawo'nɨngkiso so'nji nɨhu'nahone noho'nosyɨhwasi sɨmeho anga'nohino'nji oso syoho yokumpohn'nyo Anɨtu nejopalokuso oso nto'no uyano.

Hebrews 12

Nakwoe Hwe Engo Jisas honɨngkano netɨhwayo'ne sohune'no huno wosyofɨsyano.

1 Oso a'amu sɨsɨhwayo pa'nyoso Anɨtumo sɨmeho hi'ntnnono umotofoso hofɨko sɨmeho hi'ntnnono uyo'ne yahinoso nto netɨhwamentohofofoho. Hofɨkoe hungkunoso upa'nɨwo'nɨngkuhwono. Oso'no nakwo Anɨtuye honɨngkanomo walokuhwone hn'nwi nakwo yo'mayo wonyoso Anɨtuye honɨngkano wopɨngomo pɨjwonesyohumaso so'nji yo'mayo yahino nakumo yokumpohn'nyo nemokosyohumawo'nɨngkiso so'nji nɨhu'nahone noho'nosyɨhwasi sɨmeho anga'nohino'nji oso syoho yokumpohn'nyo Anɨtu nejopalokuso oso nto'no uyano. 2 Ose ihwasi nakwo Jisasɨmo tɨmo anga'no honɨngkuhwasi kakimne'nohini huno wosyofɨsyano. Nakwo kakimo sɨmeho hi'ntnnono uyo kako hwapɨngo hweho. Sɨmeho hi'ntnnono uyo yahinoso kako nɨhu'no yokumpohn'nyo imokone hweho. A'amu iyo hwojiyafɨku'nnyo sopo poyo pe'nɨmentohofoso yofe nɨhu'no wonyo ma'mentohofofoho. I oso'no Jisas kako oso wonɨmango engo unyoso'no mosyafɨsiyo'njo yonto kako po'nɨfo mmo'nɨmmentisofoho. O'o, hwapɨngoso Jisas kako huno syafɨhu'mento, Anɨtu nje sɨmeho wopɨngo nɨmokonefoho. Oso'no syafɨsyonto Jisas kako sɨmeho hi'ntnnono Anɨtumo uyonto nakumne'no tohino engo manto poyo pe'nɨmentisofoho. Oseso olohonta kako kanɨngkwohwo Anɨtuye aho angahohnta'ni nohumanto yo'mayo hopi'nonohino somo mokosyohumaho.

Anɨtu nakumo tango nejapososo nakumo wopɨngo namokiyo'nefoho.

3 Jisas nakumne'no a'amu wonyo somo enjwa'mo we'enehwo humamentisofoho. Oso'no hofɨko kakine'no mangohwa imo'nontɨfi nɨhu'no wonyo uloho'mentohofofoho. Oso'no sekwo Anɨtuye syohomne'no yo'mayo tango se'mahwoso'no sekwo oso tango Jisas ma'mentiso so'no fɨsyafɨhupmno. Oso'no syafɨsyɨkuji sekwoe syoho wopɨngo somo nusɨkwajɨkutoho. O'o, sekwo yokumpohn'nyo inɨngkakuji syoho ito'no fiyɨmno. 4 Sekwo yo'mayo honɨngkano wonyo somo monje yasiyo'neso syoho yokumpohn'nyo fiyɨmno. A'amu fehohnjoso hofɨko honɨngkano wonyo so'ne nakwolaho lɨwo'nɨngkohofo somo nomi a'amuso hofɨkimo fonjahumentohofofoho. 5 Oso hungkuno Anɨtu kakoe mehomi hn'nɨmo yokumpohn'nyo nasosofitofo'ne nalɨmentiso so'no inɨngo laseyohoho. Olo hungkuno loso nalohoho.

Nje hwomu sohwosi, nakwoe Hwe Engo kako jɨje honɨngkano nto'no efisopekuhwajiyo'ne,
Wonyo yahino kilohofɨhwoso'no oso hungkuno homo somo kɨko haloho pofo.
Oso hiso kilohofɨhwoso'no huno ole syafɨsyɨkutoho.
Anɨtuye honɨngkanoso tango mɨkunɨmposo niyantofoho.
Ose syafɨsyohotoho.
6 O'o, a'amu hopi'nono Anɨtu nje mehomi kuyoho ulɨwo'nɨngkiso somo, Honɨngkano wonyo nɨhu'no yohotoho ulɨwo'nɨngkisofoho.
A'amu hiso honɨngkano wonyo ifijo'manji Anɨtu kako yoka ulɨmontonoho.
Ose nalɨmentisofoho.

7 Kɨko Anɨtuye hungkunomo tɨfi inɨngkahuji tango ku'mahwoso'no kɨko yokumpohn'nyo ne'no filohofo. Hwapɨngoso Anɨtu kako jɨje honɨngkanomo efisopekuhwojalofoho. Ose kilohofɨhwoso'no kɨko huno wakiyono. Kɨko kakoe mehomi hwosoho. Nanɨngkwohwosa hofɨko hofɨkoe mehomi hn'nɨmo nakwoe honɨngkanomo efisopenehwajɨwo'nɨngkohofofoho. 8 Nakwo a'amu hopi'nonohino hn'nwi honɨngkano wonyo'njo'nwoho. Oso'no Anɨtu kako kakoe honɨngkanomne'no nto'no wefisopenehwajono. Anɨtu kako jɨje honɨngkanomo nto'no momekuhwajiyo'manji kɨko kakoe mehomi hwosɨ'maho. O'o, kɨko sɨkumehomi pa'nyo hwosoho. 9 Nakwo nanɨngkwohwosa hofɨko nakwoe honɨngkano wonyomo menehwojahonɨngkofi nakwo hofɨkoe yofe ho'nomawo'nɨngkuhwono. Oso'no Anɨtu kako nakumo kakoe honɨngkanomne'no nto'no efisopenehwajɨhwoso'no nakwo haloho pehwasi honɨngkano wopɨngo'nohini uyano. Kako nakwoe huyo'mangomo mokosyohumawo'nɨngkiso hweho. Oso'no nakwo enjwa'mo nohumehwasi nto'no wohumano. 10 Hwahoponjo nanɨngkwohwosa hofɨko hofɨkoe huno mta'ni olo hwaho lopo we'enehwo humayo'ne nakwoe honɨngkano nto'no menehwajɨwo'nɨngkohofofoho. I nanɨngkwohwo Anɨtu kako kakoe honɨngkanomne'no efisopenehwojahonɨngki nakwo wopɨngo imo'nalokuhwono. Ose nalohofɨhwoso'no nakwo kako pa'nyo umo'nantanoho. 11 A'amu nakwoe honɨngkanomo nto'no menehwajɨkujo'no nakwo tango engo wotɨpemantanoho. I oso'no nakwo wopɨngo humayo'ne Anɨtu kako nakwoe honɨngkano wonyomo somne'no menehwajɨhwoso'no ne unto'nɨmontonoho. Oso ipisayo neso a'amu'nji sɨmeho pompengo ifisyamo'nyo'nefoho.

Nakwo yokino ito'nɨngkuhwasi yokumpohn'nyo wolohofano.

12 Ose selohe so'no sekwo Anɨtumne'no yokumpohn'nyo filohopmno. 13 Sekwoe honɨngkano nto'no mɨhwajɨkuji a'amu sɨfe po'nɨfo'njo senɨngkape sohwo kako mapɨwasyonehoho. O'o, hano ito'no ihwosi sɨfe po'nɨfoso yokumpohn'nyo umo'nɨmontonoho.

14 Sekwo sekwoe a'amu'nji pompenjiyo humayo'ne syoho yokumpohn'nyo fiyɨmno. I sekwo honɨngkano wonyo hopi'nonohino foho'naopmno. Sekwo honɨngkano wonyo nɨhu'no ane humayo so'no syoho yokumpohn'nyo fiyɨmno. A'amu honɨngkano wonyo'njoso hofɨko nakwoe Hwe Engo sohumo muhwonɨfitnnefoho. 15 Anɨtu kako wopɨngo waseloho'mo. Wosefo'ma'mo. Ose nalɨhwoso'no a'amu fihwo kako nupa'nɨngkuhwosi Anɨtumo ole ulonoho. Nɨfo'mayoso peho'neto. Ngkilaho. Ose ulonoho. Oso'no sekwo Anɨtumne'no yokumpohn'nyo lohofɨkuji fo'ma'nɨmno. Anɨtu kako nefo'mayoso nakwolaho ulɨhwasi hofohofahn'no nakwoe sɨmeho wonyo wonamo'nɨmontonoho. Sɨmeho wonyo namo'nɨngkuhwoso'no a'amu pi'nɨngo engo somo tohino uyantanoho. A'amu sɨmeho wonyo'njo sohwo kako nom'ne a'amu somo honɨngkano wonyomo ipemotahwoso'no oso hwe huhwo sohumo Anɨtu kako wonyo hwosoho ulɨmontonoho. 16 A'amu fihwo sekwo'nji humaso sohwo kako a'mohufo ihwoloho. A'amu fihwo sekwo'nji humaso sohwo kako Isou Anɨtumo hwotoho hmmentiso pa'nyo ihwoloho. Isou kako mijoho engo uyahonɨngki kanɨngkwohwo Aisak kakoe tisɨmaso sohumo aho ulonjimokone so'no Isou kako huno ole syafɨhu'mento, U kakoe syohofoho. Nje nɨngkwahwo Jekoup kako womano. Ngko mijoho pe'nalokweno. Ose syafɨsyonto Isou kakimo hwosopisyafɨhwosi Jekoupɨmo aho ulonjimokone somjo wosopayo so'no ulahonɨngki Jekoup kola'wehumo oso wopayoso mpe uloho'mentisofoho. 17 Sekwo huno seyohoho. Tɨfi no'mo Isou oso aho wontonjɨmokononto somjo hungkunoso aku woma'mo lonto yahonɨngki kanɨngkwohwo Aisak muyɨmmentisofoho. O'o, Isou kako humotaho engo lonto oso wonyo imentiso somo wae yamo'nyoso hopo'maho.

Nakwo hwofɨki'nyo wonyoangkafo Saiyon sopo nto sɨ'momalohwono.

18 Anɨtu kako a'amu Isɨlael somo kakoe hungkuno hwofɨki'nyo Sainai sopo uyɨmentiso sohonta himo sɨkwo'mnoso hwofɨki'nyo hopo sopo ifeehu'mo yahumentisoso toho ahwomo mta'ango uhwonontɨfi ifofo engo yahonɨngki hi ulɨkofahonɨngki iyoho mɨkunɨmposo unɨmentisofoho. Kounoho yoka ho'nonto mampaho ahwomo mta'ni ole ho'nɨmento, A'amu fihwo olo hwofɨki'nyo loso kako aho pm'mokoso sohumo sekwo sojo'nji fonjahumno. A'amu'nohinɨ'maho. O'o, yahu'nji hwofɨki'nyo lopo hano weso sohumo fonjahumno. Ose ho'nɨngkahonɨngki a'amuso iyoho unɨngkahonɨngki hofɨko Mousesɨmo ulɨmentohofi, Mouses kɨko Anɨtumo ole uso, Oso hungkuno tango mɨkunɨmposo so'no nakwo iyoho nenalofoho. Nakwo olo mampaho loso nupa'nɨngkuhwaloho. Ose uso. Ose ulahonɨngkofi Mouses ulɨmento, Ngko huhwo'ni yomo yonji iyoho nnɨngkohoho. Ose ulɨmentisofoho.

22 I sekwo soku hofɨko ose uhwonɨmentohofo pa'nyoso sekwo muhwonɨmmentohofofoho. O'o, sekwo hwofɨki'nyo Saiyon Anɨtu songo humaso sohwoe ahwomomjo ango engo Jelusalem osopo i'mofapmmalofo. Osopo a'amu ahwomomjo nɨhu'no pi'nɨngo engoso sɨmonyo yontanɨngkofi i'mofapohofo. 23 Osopo sekwo Anɨtuye mehomi hopi'nono tisɨmaso pa'nyo kuyoho. Sekwoe yofe Anɨtu nto mtɨ'mokumentisoso ahwomomo weho. Anɨtu a'amu hopi'nonohinofe hungkunomo ikwolofo'ne yano ulofiyo sohumo sekwo i'mofapohofo. A'amu Anɨtumo sɨmeho hi'ntnnono uyontɨfi poyo pe'nɨmentohofo somo Anɨtu kako Wopɨngo kuyoho, ulɨmentiso osomo wopɨngo ne nto imokumentisofoho. Oso a'amu hiso osopo humalofo. 24 Jisas kako Anɨtuye angopo ne'no siyo'ne honɨngkano songo kakoe honɨyo'nji hwosampo'mentiso sohwo osohumo sekwo i'mofapohofo. Kakoe honɨyo so'nji nakumo kako'nji mokojɨjwonahinyofoho. Oso'no Apel kakoe honɨyo usɨhuma'mentiso somo Jisas kakoe honɨyoso hwofilo'nnyofoho.

Nakwo Anɨtuye mampaho somo haloho nto'no pehwasi i'waho nto'no uyano.

25 Sekwo nto'no fɨsyafɨhupmno. Hohonta Anɨtu Mousesɨmo hungkuno yokumpohn'nyo uyahonɨngki a'amu Isɨlaelɨso haloho maposo'njo imentohofofoho. Oso'no hofɨkoe honɨngkano wonyo so'no tohino engo ma'mentohofofoho. Tohino homo somo hofɨko muyakolo'mmentohofofoho.

Oseso Kɨlais ahwomomo humaso sohwo hungkuno yokumpohn'nyo nto nejapmmentisofoho. Oso hungkuno homo somo haloho maposo'njo ihwasi hohujo ikinjaofososo nakwo tohino engo mayo sohonta hiyaso ntɨ'mte waneto. Nɨhu'no awonoho. 26 Hohonta Anɨtuye mampaho hwofɨki'nyo Sainai sopo nta'ni ho'nɨngkahonɨngki hwaho hwomɨhwo imentisofoho. I oso'no olohonta Anɨtu ole nelalofi, Sɨkuno nom'nemo hwomɨhwo ihwosi hwaho nɨhu'nahone wae yao'mnefoho. Hwaho'nohino'maho. O'o, ahwomo hi'nji wae imnefoho. Ose nelalofoho. 27 Oso hungkuno hwomɨhwo ihwosi hwaho wae yao'mnefoho nelalofonjo hwapɨngoso ole, yo'mayo yo'mayo Anɨtu olo hwaho lopo mtɨ'mokumentisoso hwomɨhwo ihwosi wae yonefoho. I yo'mayo Anɨtu ngko nje angomo womokosyohumamo loso so'nohini ne'no nowentɨhwonefoho.

28 Ose nalisoso'no nakwo sɨmonyo uyano. Anɨtu nemokosyohumayo sopo moi'wo mmo'nonehoho. O'o, ne'no nowentɨhwoneponoho. Oso'no nakwo Anɨtumo isamoyoka ulɨhwasi kakoe sɨmeho wopɨngo umo'nyo'ne so'no kakoe syoho hofiyo ulohofiyano. Anɨtuye yofe ho'nomehwasi kakoe yokumpohn'nyo so'no iyoho wonanono. 29 Hwapɨngoso nakwoe Anɨtu kako yo'mayo wonyo iyoso'no nɨhu'no yokumpohn'nyo nelalofi, Yo'mayo wonyoso nɨhu'no ngkilaho. Ose nelalofoho.